O‘zbekiston FA Polimerlar kimyosi va fizikasi instituti olimlari xalqaro hamkorlar bilan birgalikda infeksiyalangan yaralarni davolashga mo‘ljallangan yangi avlod aqlli gidrogel bog‘lamasini ishlab chiqdi. Tadqiqot natijalari nufuzli “Chemical Engineering Journal” jurnalida e’lon qilinib, xalqaro e’tirofga sazovor bo‘ldi.
Yangi gidrogel yuqori yopishuvchanlik, elastiklik, antibakterial va antioksidant xususiyatlarga ega bo‘lib, yarani tashqi ta’sirlardan himoya qiladi hamda bitish jarayonini tezlashtiradi. Uning tarkibidagi maxsus komponentlar teri to‘qimalariga mustahkam yopishib, uzoq muddat barqaror saqlanishini ta’minlaydi.
Ushbu innovatsion ishlanma an’anaviy bog‘lamalarga nisbatan samaraliroq bo‘lib, yaralarning tez va xavfsiz bitishida istiqbolli yechim sifatida baholanmoqda.
