Surxondaryo viloyatida turizm sohasini rivojlantirishga qaratilgan loyihalar ijrosi muhokama qilindi. Viloyat hokimi Ulug‘bek Qosimov har bir tuman va shaharning joylashuvi, tarixi hamda salohiyatini inobatga olgan holda ishlab chiqilgan ramziy stella loyihalari taqdimoti bilan tanishdi.
Taqdim etilgan loyihalar ma’qullanib, hududlar chegaralarida stellalar qurilishini belgilangan muddat va yuqori sifatda amalga oshirish vazifalari belgilandi. Shuningdek, yig‘ilishda mehmonxonalar qurilishi, turizm sohasidagi vazifalar ijrosi hamda “Sangardak” turizm majmuasi qurilishining borishi muhokama qilindi.
Soha va hudud mas’ullarining hisobotlari, loyiha tashabbuskorlari murojaatlari tinglanib, mutasaddilarga barcha ishlarni manzilli, samarali va sifatli tashkil etish bo‘yicha tegishli ko‘rsatmalar berildi.
