Prezident qaroriga muvofiq, kitobxonlikni targ‘ib etishga qaratilgan yangi tashabbuslar umumta’lim muassasalarida ham bosqichma-bosqich joriy etiladi. Jumladan, maktablarda “Jadidlar izidan” kitobxonlik klublarini tashkil etish rejalashtirilmoqda.
Qarorga ko‘ra, 2026-yil 1-fevraldan boshlab aholi, ayniqsa yoshlar o‘rtasida kitobxonlik madaniyatini rivojlantirishga qaratilgan “Kitob – ma’rifat manbai” dasturi amalga oshiriladi. Shuningdek, davlat organlarining kitob va kitobxonlikka oid targ‘ibot materiallari ijtimoiy reklama sifatida e’tirof etiladi.
Bundan tashqari, jamoat transportlarida — avtobus, metro, samolyot va poyezdlarda “Mutolaa” platformasidan simsiz yoki mobil internet orqali foydalanish imkoniyati yaratiladi hamda qulaylik uchun QR-kodlar o‘rnatiladi.
Umumta’lim muassasalarida tashkil etiladigan “Jadidlar izidan” kitobxonlik klublari doirasida kitob tahliliga bag‘ishlangan debatlar o‘tkaziladi. Klub a’zolariga yil davomida kamida 20 ta kitob o‘qitiladi hamda har chorakda tuman va shahar miqyosida eng faol klub a’zolari munosib rag‘batlantiriladi.
