Angor tumanidagi “Gulzor” mahallasida faoliyat olib borayotgan “Art Design Sofia” mas’uliyati cheklangan jamiyati ijtimoiy mas’uliyatli tadbirkorlik yo‘nalishida samarali faoliyat yuritib kelmoqda. Korxona rahbari, I guruh nogironi Sofiya Mahmadmurodova tashabbusi bilan bugungi kunda tumandagi 53 nafar nogironligi bo‘lgan shaxs kasanachilik asosida doimiy ish bilan ta’minlangan.
Loyiha doirasida korxonaga davlat tomonidan 156 million so‘m miqdorida subsidiya ajratilib, ushbu mablag‘lar ishlab chiqarish quvvatlarini kengaytirish, zamonaviy uskunalar xarid qilish hamda yangi ish o‘rinlarini yaratishga yo‘naltirilgan. Shuningdek, bugungi kunda korxonada faoliyat yuritayotgan ayol xodimlarga homiladorlik va tug‘ruq nafaqalari Davlat ijtimoiy sug‘urtasi jamg‘armasi orqali to‘lanayotgani tadbirkorlar uchun muhim qulaylik hisoblanadi.
Mazkur tashabbus nogironligi bo‘lgan shaxslarning bandligini ta’minlash, ularni jamiyatga faol integratsiya qilish hamda ularning ijtimoiy faolligini oshirishga xizmat qilmoqda.
