Yangi yil quvonchli tadbirlar, ezgu tashabbuslar bilan boshlandi. Termiz shahridagi tantanalar majmuasida “Xorijdagi vatandoshlarimiz oilalari doimiy e’tiborda” shiori ostida xayriya va ko‘ngilochar bayram tadbiri tashkil etildi. Tadbir jamiyatda mehr-oqibat, hamjihatlik va ijtimoiy birdamlik tuyg‘ularini yanada mustahkamlashga xizmat qildi.
Bayram tadbirida viloyat hokimining birinchi o‘rinbosari Sherzod Rajabov ishtirok etib, mehnat migrantlari oilalari, ayniqsa, ularning farzandlarini qo‘llab-quvvatlash davlat siyosatining muhim yo‘nalishlaridan biri ekanini alohida ta’kidladi.
Shundan soʻng, bolajonlar uchun quvnoq sahna ko‘rinishlari, ertak qahramonlari ishtirokidagi chiqishlar va bayramona konsert dasturlari namoyish etildi. Kulgi va quvonchga to‘la lahzalar bolalarning chehrasida samimiy tabassum, qalblarida esa Yangi yil mo‘jizasiga bo‘lgan ishonchni uyg‘otdi.
Shuningdek, har bir bolaga Yangi yil sovg‘alari topshirilib, ularning xursandchiligi va quvonchi tadbirga alohida fayz bag‘ishladi. Ushbu bayram tadbiri jamiyatimizda “hech kim e’tibordan chetda qolmaydi” degan ezgu tamoyilning yana bir yorqin ifodasiga aylandi.
