Yurtimizda sportni rivojlantirish, iqtidorli yoshlarni aniqlash va ularni yuqori darajadagi musobaqalarga tayyorlash maqsadida olimpiya sport turlari bo‘yicha “Yangi O‘zbekiston Olimpiya cho‘qqilari” musobaqalarini o‘tkazish hamda uning respublika final bosqichi “Prezident olimpiadasi” sifatida o‘tkazilishi belgilangan.
Surxondaryo viloyati hokimi Ulug‘bek Qosimov Muzrabot tumaniga tashrifi davomida Sport maktabida “Prezident olimpiadasi”da ishtirok etuvchi voha sportchilari va ularning murabbiylari bilan uchrashdi.
Uchrashuvda sportchilarning musobaqaga tayyorgarligi, jismoniy holati, ruhiy barqarorligi va ularning ishtirokiga bo‘lgan ishonchi haqida fikr almashildi. Murabbiylarga mashg‘ulotlarni yanada takomillashtirish, sportchilarning individual imkoniyatlarini oshirish hamda musobaqaga har tomonlama puxta tayyorgarlik ko‘rish bo‘yicha zarur tavsiya va ko‘rsatmalar berildi.
Shuningdek, Sport maktabidagi sharoitlar ko‘zdan kechirilib, yoshlarning sport bilan muntazam shug‘ullanishi uchun zarur infratuzilma va jihozlarni yanada takomillashtirish yuzasidan topshiriqlar berildi.
Uchrashuv yakunida viloyat rahbari sportchilarga omad tilab, ularning viloyat sharafini munosib himoya qilishiga ishonch bildirdi.
