Termiz davlat muhandislik va agrotexnologiyalar universitetida Termiz shahar politexnikumi, Muzrabot tuman politexnikumi, Jarqo‘rg‘on tuman 1-son politexnikumi hamda universitet huzuridagi akademik litsey bitiruvchilari uchun ochiq eshiklar kuni doirasida ekskursiya va informatsion ma’ruza tashkil etildi. Muhandislik va agrotexnologiyalar sohasiga qiziqishi baland bo‘lgan o‘quvchilar o‘z o‘qituvchilari hamrohligida universitetga tashrif buyurib, ularni qiziqtirgan savollarga javob oldilar.
Uchrashuv davomida ishtirokchilarga universitetning ilmiy salohiyati, talabalar hayoti, o‘quv jarayoni hamda zamonaviy laboratoriyalar faoliyati haqida batafsil ma’lumot berildi. Shuningdek, mehmonlar uchun o‘quv xonalari, ARM, “Registrator ofisi”, o‘quv va amaliyot laboratoriyalari, robototexnika xonasi va “Adiblar xiyoboni”ga ekskursiya tashkil etildi. Yoshlar universitet va talabalar uchun yaratilgan sharoitlar bilan tanishishdan mamnun bo‘ldilar. Uchrashuv yakunida yosh, intiluvchan va sohaga qiziquvchan o‘quvchilarning kelgusi o‘quv yilida TDMAUning katta va do‘stona jamoasiga qo‘shilishlariga umid bildirildi.
