O‘zbekiston Respublikasi Prezidenti huzuridagi ijtimoiy himoya milliy agentligi tasarrufidagi Sho‘rchi tumanida joylashgan alohida ta’lim ehtiyojlari bo‘lgan (zaif eshituvchi va kar) bolalar uchun ixtisoslashtirilgan 122-sonli maktab-internatida qiymati 500 million so‘mlik rekonstruksiya ishlari amalga oshirildi. Loyiha doirasida ilgari foydalanishga yaroqsiz holatda bo‘lgan sport zali kapital ta’mirdan chiqarilib, o‘quvchilar ixtiyoriga topshirildi.
Ochilish marosimida maktab direktori hamda jamoatchilik faollari o‘quvchilarni, ularning ota-onalarini va pedagoglar jamoasini muborakbod etdi.
Ushbu maskanda nafaqat jismoniy tarbiya fanlari namunali tarzda o‘tilmoqda, balki 10 ga yaqin sport to‘garaklari faoliyat yuritmoqda. Mazkur tashabbus o‘quvchilarni parasportga jalb etish, ularning bo‘sh vaqtini mazmunli tashkil etish hamda sog‘lom turmush tarzini shakllantirishga qaratilgan.
Hozirda maktabda 411 nafar o‘quvchi tahsil olmoqda. Har bir bola o‘z qiziqishiga qarab turli sport turlariga yo‘naltirilgan. Yaratilgan zamonaviy sharoitlar o‘quvchilarning sog‘lom, baquvvat va irodali bo‘lib ulg‘ayishiga, shuningdek, sifatli ta’lim olishini ta’minlashga xizmat qiladi.
