Afg‘on-u turk investorlar hamkorimiz

Surxondaryo viloyati hokimi Ulug‘bek Qosimov xorijiy sarmoyadorlar bilan hamkorlikni kengaytirish, mintaqaga yangi investitsiya oqimini jalb etish bo‘yicha uchrashuvlarini davom ettirmoqda. Navbatdagi muloqotda Afg‘onistonning “Afghan German Company”, “Developments-Rest” va “AmuGold Alliance” kompaniyalari, shuningdek, Turkiyadan tashrif buyurgan investor Rabi Mirvays ishtirok etdi.
Uchrashuv chog‘ida Termiz shahrida amalga oshirilayotgan zamonaviy ko‘p qavatli turar-joylar, ta’lim muassasalari va biznes markazlari qurilishi jarayonlari, shuningdek, yangi tibbiyot klinikasining faoliyatini kengaytirish masalalari atroflicha ko‘rib chiqildi. Shu bilan birga, Termiz tumanida ruda qayta ishlash loyihasini yo‘lga qo‘yish tashabbusi ham muhokama markazida bo‘ldi.
Tomonlar mazkur loyihalarni sifatli va belgilangan muddatlarda amalga oshirish, zarur infratuzilmani shakllantirish hamda xorijiy investorlarning O‘zbekistonga kirish va faoliyat yuritish jarayonini soddalashtirish bo‘yicha aniq chora-tadbirlarni belgilab oldilar.
Uchrashuv yakunida barcha ishtirokchilar Surxondaryo viloyatining iqtisodiy salohiyati, qulay investitsion muhiti va davlat tomonidan yaratilayotgan keng imkoniyatlar sarmoyadorlar uchun ishonchli hamkorlik maydoni ekanini ta’kidladilar. Mazkur tashrif mintaqada sanoat, qurilish va xizmat ko‘rsatish sohalarida yangi ish o‘rinlari yaratish, hududning iqtisodiy barqarorligini mustahkamlash hamda O‘zbekiston–Afg‘oniston–Turkiya hamkorligini yanada rivojlantirish yo‘lida muhim qadam bo‘ldi.