Surxondaryolik dzyudochi, Boysun tumanining faxri Samariddin Muxibiddinov Peru poytaxti Lima shahrida o‘tayotgan yoshlar o‘rtasidagi jahon chempionatida bronza medalini qo‘lga kiritdi.
81 kilogramm vazn toifasida bellashgan Samariddin hal qiluvchi bahsda niderlandiyalik raqibini mag‘lub etib, jahon chempionatining shohsupasidan joy oldi. Bu g‘alaba nafaqat sportchining mehnatsevarligi va matonatini, balki o‘zbek dzyudo maktabining kuchli an’analarini yana bir bor namoyon etdi.
Samariddin O‘zbekiston milliy terma jamoasi tarkibida mamlakat sharafini munosib himoya qilmoqda. Uning ushbu yutug‘i Surxondaryo yoshlari uchun ham ibrat, ham faxr manbayidir.
