Sariosiyo tumanida “Birgalikda kuchmiz” shiori ostida o‘tkazilgan ekologik aksiyada turli millat va elat vakillari, 100 dan ortiq yoshlar hamda keng jamoatchilik vakillari faol ishtirok etdi.
Tadbir davomida Millatlararo munosabatlar qo‘mitasi tashabbusi bilan Mirzo Ulug‘bek va Billur mahallalaridan o‘tuvchi 1,5 kilometrlik asosiy ko‘cha obodonlashtirildi. Ishtirokchilar hududda tozalash va ko‘kalamzorlashtirish ishlarini olib borib, mahallaning yanada chiroyli va ozoda bo‘lishiga hissa qo‘shdilar.
Ekologik tashabbus nafaqat atrof-muhitni asrash, balki turli millat va elat vakillari o‘rtasidagi do‘stlik, birdamlik va bag‘rikenglikni yanada mustahkamlashga xizmat qildi.
So‘nggi yillarda davlat siyosatining ustuvor yo‘nalishlaridan biri sifatida millatlararo totuvlik, do‘stona muhit va yurtga muhabbat ruhini yoshlar qalbiga singdirish bo‘yicha keng ko‘lamli ishlar amalga oshirilmoqda. Sariosiyoda o‘tkazilgan mazkur aksiya esa bu ezgu maqsadlarning amaldagi ifodasi bo‘ldi.
Ishtirokchilar bunday tadbirlar kelajak avlodni tabiatga mehr, Vatanga sadoqat va insonlarga hurmat ruhida tarbiyalashda muhim ahamiyat kasb etishini ta’kidladilar.
