Ijtimoiy sohani rivojlantirish doirasida ta’lim muassasalari imkoniyatlaridan samarali foydalanish, o‘quvchilar uchun zamonaviy sharoitlar yaratish va aholi ehtiyojlariga mos infratuzilmalarni barpo etish ishlari bosqichma-bosqich amalga oshirilmoqda.
Termiz shahridagi 5-sonli maktabda hozirda keng ko‘lamli ta’mirlash va yangilash ishlari olib borilmoqda. Loyihaga ko‘ra, mavjud binolar rekonstruksiya qilinib, bo‘sh hududlarda sport va o‘quv jarayoni uchun qo‘shimcha obyektlar barpo etiladi. Jumladan, futbol, basketbol va “Workaut” maydonlari, kibersport va IT-markaz, o‘q otish zali, shuningdek, qandolatchilik hamda tikuvchilik ustaxonalari qurilishi rejalashtirilgan.
Surxondaryo viloyati hokimi Ulug‘bek Qosimov mazkur maskanda amalga oshirilayotgan qurilish-ta’mirlash jarayonlari bilan tanishdi. Shuningdek, “Jo‘yjangal” mahallasi hududidan oqib o‘tuvchi kanalni rekonstruksiya qilish asosida savdo va maishiy xizmat ko‘rsatish nuqtalari hamda aholi uchun saylgoh tashkil etish bo‘yicha loyihalar taqdimoti o‘tkazildi.
Viloyat rahbari tashrifi davomida fuqarolar e’tiroziga sabab bo‘lib kelayotgan Manguzar mahallasidagi o‘yingoh muammosini ham o‘rgandi. Mas’ullarga futbol maydonini kapital ta’mirlash, “Workaut” va “Stritbol” maydonchalarini qurish, hududni obodonlashtirish hamda tomoshabinlar uchun qulay sharoitlar yaratish vazifalari topshirildi. Mazkur chora-tadbirlar nafaqat yoshlarning bo‘sh vaqtini mazmunli o‘tkazishiga, balki ularning salomatligini mustahkamlash va kelgusida kasb-hunar egallashiga keng imkoniyat yaratishi bilan ahamiyatlidir.
