Atrofni ko‘z qiri bilan tekshirgan bo‘lib, yonidagi kampirning hamyonini o‘g‘rincha o‘z sumkasiga soldi. Hech kim ko‘rib qolmaganiga ishonch hosil qilib, do‘kondan olgan gazli suvining pulini to‘lab shoshib chiqib ketdi.
Katta o‘ljadan mamnun bo‘lib, qo‘lidagi sumkasini o‘ynatgancha sakrab-sakrab qadam tashlab ketaverdi. To‘satdan o‘sha do‘kondagi sotuvchi bolaning uni chaqirib yugurib kelayotganini ko‘rdi-yu, qadamini tezlatdi.
Bola yetib olib uning yo‘lini to‘sdi, hansiragancha qo‘lidagini uzatdi:
— Gazli suvni unutib qoldiribsiz.
Arjumandbegim
