Sho‘rchi va Denov tumanlarida qishloq xo‘jaligini rivojlantirishga bag‘ishlangan amaliy seminarlar o‘tkazildi. Tadbirlarning asosiy maqsadi – mavjud muammolarni bartaraf etish, ishlab chiqarish hajmini oshirish hamda yangi imkoniyatlardan samarali foydalanishdan iborat bo‘ldi.
Sho‘rchi tumanida o‘tkazilgan seminarda Jarqo‘rg‘on, Qumqo‘rg‘on, Sho‘rchi va Oltinsoy tumanlari hokimlari, soha mutasaddilari, fermer xo‘jaliklari va tadbirkorlar ishtirok etdi. Denov tumanidagi yig‘ilishda esa Uzun, Sariosiyo va Denov tumanlaridan mas’ullar hamda qishloq xo‘jaligida faoliyat yuritayotgan ishbilarmonlar qatnashdi.
Muloqotlarda 2026-yilgi g‘alla hosili uchun urug‘ ekish ishlarini samarali tashkil etish, chorvachilik va bog‘dorchilikni rivojlantirish, yer maydonlaridan oqilona foydalanish, tokchilik yo‘nalishida xatlovlar o‘tkazish, shuningdek, paxta yig‘im-terimini sifatli o‘tkazish masalalari atroflicha muhokama qilindi.
Seminarda mutasaddilar amalga oshirilayotgan ishlar yuzasidan hisobot berdi, fermer va tadbirkorlar esa o‘z taklif va fikr-mulohazalarini bildirib o‘tdilar. Yakunda har bir yo‘nalish bo‘yicha natijadorlikni oshirishga xizmat qiladigan aniq vazifalar belgilab olindi.
