Termiz davlat universitetida AQSh elchixonasi huzuridagi Mintaqaviy ingliz tili boʻlimi (RELO) vakillari bilan uchrashuv bo‘lib o‘tdi. Rasmiy uchrashuv davomida AQSh elchixonasi bilan amalga oshirilgan loyihalarga toʻxtab oʻtildi va kelgusidagi rejalar muhokama qilindi.
2025–2026-o‘quv yilida universitetimizda “English Language Fellow” dasturi doirasida faoliyat olib boruvchi Kinsey Norton xonim rahbariyat, xorijiy filologiya fakulteti jamoasi talabalarga tanishtirildi va davra suhbati oʻtkazildi.
Kinsey Norton shu vaqtga qadar AQSh, Litva, Rossiya va Qirgʻiziston ta’lim dargohlarida ingliz tili boʻyicha oʻquv mashgʻulotlarini olib borgan. “Universitetingiz talabalari bilan ularning ingliz tili, ayniqsa, gapirish va yozish koʻnikmalari ustida ishlashni niyat qilganman. Oʻylaymanki, fakultet jamoasi ham meni yaxshi qabul qiladi, yuqori natijalarni birgalikda qayd etamiz. Shuningdek, talabalarni oʻzim tashkil etadigan “Speaking Club”ga taklif etaman”, – deya ta’kidladi Kinsey Norton.
Ma’lumot oʻrnida, elchixona tomonidan yuborilgan ETA dasturi boʻyicha AQShlik mutaxassis Christopher Cowan 2021-2022-oʻquv yilida universitetda faoliyat olib borgan edi.
