Mustaqilligimizning 34 yilligiga bag‘ishlangan bayram tantanalariga qizg‘in tayyorgarlik ko‘rilmoqda. Jumladan, Termiz shahrida joylashgan “San’at saroyi” majmuasi yozgi amfiteatrda viloyat miqyosidagi asosiy bayram tadbiriga tayyorgarlik ishlari izchil davom etmoqda.
Viloyat hokimi Ulug‘bek Qosimov mazkur maskanga tashrif buyurib, asosiy sahna va atrofdagi yo‘laklar, maydonlarni bayramona ko‘rinishga keltirish, dekoratsiyalar bilan bezatish hamda konsert dasturiga tayyorgarlik holati bilan tanishdi.Ilgarigi o‘rganishlar davomida berilgan topshiriqlar ijrosi yuzasidan mas’ullar axboroti tinglandi. Shuningdek, tayyorgarlik ishlarini yanada jadallashtirish va reja asosida tashkil etish bo‘yicha aniq vazifalar belgilab berildi.
Keyingi manzilda viloyat rahbari Termiz tumanidagi “Uchqizil” suv ombori hududida tashkil etilishi rejalashtirilgan “Yoshlar va turizm” ko‘chasi qurilish ishlarini ham ko‘zdan kechirdi. U yerda olib borilayotgan ishlar talab darajasida emasligi, ayrim qurilish-ta’mirlash ishlari to‘xtab qolgani tanqid qilindi. Tuman rahbariyati va loyiha ijrochilariga yo‘l qo‘yilgan kamchiliklar ko‘rsatilib, zarur ko‘rsatmalar berildi.
Shuningdek, barcha kuch va imkoniyatlarni jalb etgan holda 2 kilometr uzunlikdagi piyodalar va velosiped yo‘laklarini barpo etish, shuningdek, savdo va xizmat ko‘rsatish nuqtalarining qurilishini jadallashtirish vazifalari belgilandi.
