So‘nggi yillarda barcha sport turlari qatori voleybolga ham keng e’tibor qaratilmoqda. O‘zbekiston Respublikasi Prezidentining 2024-yil 19-iyuldagi “Voleybol sport turlarini yanada rivojlantirish chora-tadbirlari to‘g‘risida”gi PQ-274-sonli qarorining ijrosini ta’minlash hamda chekka hududlarda voleybol sportini rivojlantirish, hakamlarning bilim va malakasini oshirish maqsadida o‘quv-seminarlar, ko‘plab musobaqalar tashkil etib kelinmoqda.
Respublikamizning barcha shahar va tumanlarida jismoniy tarbiya va sportni rivojlantirish hamda uning moddiy-texnika bazasini mustahkamlash maqsadida byudjetdan 2 trillion 230 milliard so‘m mablag‘ ajratilgani ham sohada munosib shart-sharoit yaratishga xizmat qiladi.
Yosh toifalari bo‘yicha xotin-qizlar, o‘g‘il bolalar o‘rtasida O‘zbekiston chempionatlari o‘tkazilib, iqtidorli yoshlar kashf etilmoqda. O‘tgan yilgi musobaqada xorazmlik voleybolchi qizlar jamoasi chempion bo‘lgan bo‘lsa, erkaklar jamoalari baxsida O‘ztelekom jamoasi 1-o‘rinni va oltin medallarni qo‘lga kiritdi. Markaziy Osiyo davlatlari o‘rtasida SAVA xalqaro turnirlarida turli yoshdagi o‘smirlar, kattalar g‘olib va sovrinli o‘rinlari ko‘lga kiritdi. Xalqaro musobaqalarda Rossiya, Polsha, Qirg‘iziston, Tojikiston va boshqa davlatlarda o‘tkazilgan сhempionatlarda voleybol bo‘yicha natijalar quvonarli.
Viloyatimizda ham ushbu sport turini keng ommalashtirish va rivojlantirish bo‘yicha keng ko‘lamli ishlar amalga oshirilmoqda. Termiz davlat universitetida “Universiada — 2025” musobaqalarining respublika bosqichi hamda “Besh tashabbus olimpiadasi”, “Talabalar ligasi” kabi O‘zbekiston chempionatlari o‘tkazildi. Musobaqalarda talaba-yoshlarimizning voleybol jamoalari munosib ishtirok etib, quvonarli natijalarga erishdi.
R.To‘laganov,
TerDU katta o‘qituvchisi, Pedagogika fanlari nomzodi
