Irrigatsiya tarmoqlari yangilanadi

Go‘sht va sut mahsulotlari barqarorligini ta’minlash, meva-sabzavot yetishtirish hajmini oshirish hamda tomorqalardan unumli foydalanishga katta eʼtibor qaratilmoqda. Ayni maqsadda Surxondaryo viloyati hokimi Ulug‘bek Qosimov qishloq xo‘jaligi sohasi boshqarmalari faoliyati va joylarda amalga oshirilayotgan ishlar bilan yaqindan tanishdi.
Termiz shahrida Amu-Surxon irrigatsiya tizimlari havza boshqarmasi va viloyat Fermerlar kengashi faoliyati o‘rganilib, irrigatsiya tarmoqlarini yangilash, suv ta’minotini yaxshilash hamda fermerlarni qo‘llab-quvvatlash masalalari muhokama qilindi. Shuningdek, Jarqo‘rg‘on tumanida chorvador fermerlar va tadbirkorlar bilan uchrashuv o‘tkazilib, chorvachilik sohasidagi muammolar, ozuqa bazasini mustahkamlash, go‘sht va sut mahsulotlari narxini barqaror ushlab turish yuzasidan fikr almashildi. Muloqot chog‘ida aniq takliflar ishlab chiqilib, tegishli vazifalar belgilab olindi.
Tashrif doirasida chorvachilik komplekslari tashkil etish hamda qurilish materiallari ishlab chiqarishga oid investitsiya loyihalari taqdimoti ham ko‘rib chiqildi.
Yakunda Sho‘rchi tumanida g‘alla o‘rim-yig‘im jarayonlari bilan tanishildi. Yuqori samara bilan mehnat qilayotgan fermer xo‘jaliklari va mexanizatorlar mehnati alohida e’tirof etilib, rag‘batlantirildi.