Sherobod tumani tibbiyot birlashmasida yurak-qon tomir kasalliklarini tashxislash va davolashda zamonaviy mobil angiograf xizmatidan keng foydalanilmoqda. Mazkur xizmat doirasida koronar angiografiya orqali yurak tomirlaridagi torayish yoki to‘siqlar aniqlanib, bevosita joyida aniq tashxis qo‘yish imkoniyati yaratilgan.
Shuningdek, davolash jarayonlari, jumladan, stentlash — yurak arteriyalariga maxsus stentlar o‘rnatish orqali qon oqimini tiklash ishlari ham muvaffaqiyatli amalga oshirilmoqda. Ushbu xizmatning tuman va shahar darajasida ko‘rsatilayotgani esa bemorlarni viloyat yoki respublika markazlariga borish zaruriyatidan ozod etadi. Ayniqsa, olis hududlarda istiqomat qiluvchi aholi uchun bu katta qulaylik va imkoniyat yaratmoqda.
