Ayni kunlarda Surxondaryo viloyatida g‘alla va g‘o‘za parvarishi, ipak qurti boqish kabi muhim agrotexnik ishlar jadal sur’atlarda amalga oshirilmoqda. Viloyat hokimi Ulug‘bek Qosimov mazkur jarayonlarni o‘rganish va belgilangan vazifalar ijrosi bilan tanishish maqsadida Termiz, Angor, Muzrabot, Sherobod va Qiziriq tumanlariga tashrif buyurdi.
O‘rganishda hududlarda g‘o‘zaga agrotexnik ishlov berish, g‘alla parvarishi, sanoatlashgan bog‘lar tashkil etilishi hamda kasanachilar tomonidan ipak qurti boqish kabi jarayonlar ko‘zdan kechirildi. Shuningdek, joylarda soha mutasaddilari bilan uchrashuvlar o‘tkazilib, SIU hududiy rahbarlariga 10 million so‘mdan pul mukofotlari topshirildi.
Viloyat rahbari hududlarda agrotexnik tadbirlarni amalga oshirish bo‘yicha mas’ullarga tegishli ko‘rsatma va topshiriqlar berdi. Shuningdek, agrar sohadagi ishlarning qizg‘in pallaga kirganini inobatga olib, barcha vazifalarga mas’uliyat bilan yondashish zarurligini alohida ta’kidladi.
