O‘yinlar qayta boshlandi

Termizning “Surxon” futbol klubi uy stadioni hisoblangan “Surxon Arena” uch yil avval zamonaviy loyiha asosida rekonstruksiya qilish maqsadida yopilgan edi. Bu davr mobaynida o‘yingoh xalqaro standartlarga javob beradigan zamonaviy sharoitlar bilan ta’minlandi.
Ushbu stadionda superliganing 2-turi doirasida “Surxon” va “Xorazm” jamoalari o‘rtasidagi uchrashuvga start berildi. O‘yin boshlanishi oldidan Surxondaryo viloyati hokimi Ulug‘bek Qosimov barcha muxlislarni yangilangan o‘yingoh va futbol bayrami bilan qutlab, jamoalarga omad tiladi.
Uchrashuvni viloyat hokimi va boshqa mutasaddilar o‘yingohdan turib kuzatib borishdi. Yangilangan stadionda muxlislar uchun qulay shart-sharoitlar yaratilgan bo‘lib, ular o‘yinni katta qiziqish bilan kuzatishdi. Afsuski, mazkur bahsda mehmonlar 0:2 hisobida g‘alaba qozonishdi. “Surxon” jamoasiga keyingi uchrashuvlarda omad tilaymiz.