Bu yilgi Navro‘z azalgidek har tomonlama xosiyatli, qutlug‘ qadamlar bilan boshlanayotganiga hammamiz guvoh bo‘lib turibmiz. Navro‘z sayillarini keksa-yu yosh – barcha yurtdoshlarimiz katta xursandchilik va ko‘tarinki ruh bilan o‘tkazmoqda.
Zero, tinch-osoyishta elda xursandchilik, to‘y-tomosha bo‘ladi, halovatli xalqqa bayramlar yarashadi.
Navro‘z obodlik, orastalik, mehr-oqibat, xayr-u saxovat ayyomidir. Xalqimiz bu yil ham Yilboshini ana shu ezgu tamoyillarga muvofiq kutib olmoqda.
Boysun tumanida ham Navro‘z umumxalq bayramiga bag‘ishlangan sayillar ana shunday xursandchilik, ko‘tarinki kayfiyatda bo‘lib o‘tmoqda.
Dilga orom beruvchi mumtoz navolar, folklor-etnografik jamoalar ijrosidagi kuy-qo‘shiqlar, raqslar, unga hamohang tarzda o‘tmishdagi ajdodlarimizning turmush tarzi va yorug‘ orzu-umidlari, intilishlarini aks ettirgan chiqishlar barchani mahliyo etdi.
