O‘zgalar yordamisiz hayot kechirishni istaymiz. Biroq atrofimizda o‘zgalar g‘amxo‘rligiga muhtoj insonlar ham yo‘q emas. Bugungi kunda mamlakatimizda nogironligi bo‘lgan hamda o‘zgalar g‘amxo‘rligiga muhtoj oilalarga katta e’tibor qaratilib, ko‘mak berilib, keng imkoniyat eshiklari ochilmoqda. Ma’lumki, azal-azaldan xalqimiz muruvvatli, saxovatli, mehr-oqibatli. Aytish joizki, Termiz shahrida bolajonlarimiz uchun “G‘amxo‘rlik” guruhlari o‘z faoliyatini boshladi.
Mazkur guruhlarga 3 yoshdan 6 yoshgacha bo‘lgan ixtisoslashtirilgan maxsus ta’lim muassasalariga qamrab olinmagan bolajonlar qabul qilinadi. Bundan tashqari har bir “G‘amxo‘rlik” guruhi 6-8 nafar boladan iborat bo‘ladi. Bu esa bolajonlar bilan individual shug‘ullanish imkonini beradi. Ushbu guruhlar ehtiyojni inobatga olgan holda 2 ta smenada tashkil etiladi.
Ushbu guruhlarning ochilishini, ayniqsa, ota-onalar katta mamnuniyat bilan qarshi oldilar. Onajonlardan biri farzandim endi jamiyatga qo‘shiladi, deya quvongan bo‘lsa, ularning yana biri yaratilgan sharoitlar va zamonaviy jihozlarni ko‘rib, xursandchilik ko‘zyoshlarini yashira olmadi.
D.Qo‘zimurotova
