TISUda noan’anaviy tadbir

22-noyabr – Xalqaro psixologlar kuni munosabati bilan Termiz iqtisodiyot va servis universitetida Pedagogika va psixologiya kafedrasi professor-oʻqituvchilari tomonidan naan’anaviy tadbir tashkil etildi. Ertalabdan oliygoh binosining faye qismi bayramona bezatilib, talabalar va oʻqituvchilar uchun psixologik trening mashgʻulotlari tashkil etilgani barchaga oʻzgacha kayfiyat ulashdi.
Art terapiyadan tortib, qum terapiyasi, mandala terapiya, ezgu tilaklar daraxti va qiziqarli psixologik savollargacha boʻlgan mashgʻulotlarda barcha faol ishtirok etdi.
— Psixologiya — insonni oʻrganuvchi fan. Shuning uchun ham barcha sohada psixologiyaning oʻrni boʻlakcha. Bugungi trening mashgʻulotlarimiz ishtirokchilar ruhiyatidagi salbiy holatlarni, stressni bartaraf qilishga va ozgina boʻlsa-da yaxshi kayfiyat ulashishga qaratildi, — deydi Pedagogika va psixologiya kafedrasi katta oʻqituvchisi, dotsent Maqsuda Norbosheva.