“Kulgi va shodlik” kechasida
Samimiy va chin dildan kulishga nima yetsin. Kulish salomatlik uchun foydali. Kuldirish esa savob. Vohamizda ijodiy safarda bo‘lib turgan Muqimiy nomidagi O‘zbekiston davlat musiqali teatr jamoasi ana shunday savobli ishga qo‘l urishdi. Shahrimizdagi muhtasham san’at saroyida Termiz davlat universiteti talabalari uchun ko‘ngilochar dastur namoyish etishdi.
“Kulgi va shodlik” kechasida Muqimiy nomidagi O‘zbekiston davlat musiqali teatrining mahoratli aktyor, aktrisalari va raqqosalari tomonidan ijro etilgan kuy-qo‘shiq, raqs va sahna ko‘rinishlari talaba-yoshlarga xushnudlik, ko‘tarinki kayfiyat ulashdi. Vaqtlari mazmunli o‘tganidan mamnun yoshlar esa tez-tez ana shunday tomoshalarni ko‘rib turishga, ayniqsa, teatrga kelishga odatlanishga o‘z-o‘zlariga va’da berdilar.
