Talaba bo‘lish baxt. Buni bu baxtga erishgan yoshlargina his eta oladi. Albatta, talabalikka osonlik bilan erishib bo‘lmaydi. Buning uchun o‘qish, o‘rganish, qanchadan qancha tunlarni bedor, izlanish ila tongga ulashga to‘g‘ri keladi.
Termiz shahrida joylashgan “San’at saroyi” majmuasida jam bo‘lgan yoshlarning barchasi ayni bosqichlardan o‘tib talabalikka qabul qilinishgan. Buning quvonchi-yu hayajonini boshlaridan kechirishgan. Talabalikka erishgan yoshlarning quvonchiga sherik bo‘lish maqsadida 2024/2025-oʻquv yilida 1-bosqichga qabul qilingan talabalar uchun Termiz davlat pedagogika instituti tomonidan “Talabalikka bagʻishlov” tadbiri o‘tkazildi Tadbirda institut mutasaddilari, 1-bosqich talabalari ishtirok etdi.
Tadbir avvalida talabalikka ilk qadam qo‘ygan yoshlar tantanali ravishda qasamyod qilishdi hamda institut rektoridan talabalik guvohnomasi va “Bilimlar kaliti”ni qabul qilib olishdi. Shuningdek, “Yilning eng faol talabasi—2024” tanlovining institut bosqichi g‘oliblariga sertifikat va pul mukofotlari vaucherlari topshirildi. Tadbirning badiiy qismida Oʻzbekiston davlat filarmoniyasining Surxondaryo viloyati boʻlinmasi xodimlari tomonidan konsert dasturi namoyish etildi.
