Ekoaksiya o‘tkazildi

Bir kishining qilgan ishlari ko‘plarga ibrat bo‘la oladi. Shunday ekan, har bir qiladigan ishimizga e’tiborli bo‘lishimiz lozim. E’tiborsizlarcha atrofga chiqindi tashlayotgan insonning chiqindisini olib, maxsus qutiga solingchi, u ikkinchi bor bunday xatoga yo‘l qo‘ymaydi.
Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirining 2024-yil 10-sentabrdagi tegishli qarori asosida Oʻzbekiston Respublikasi “Yosh ekologlar” harakati Kengashining 2024-2025-yillarga mo‘ljallangan ish rejasiga asosan “Chiqindisiz dunyo uchun!” shiori ostida Surxondaryo viloyati Ekologiya boshqarmasi hamda Termiz davlat muhandislik va agrotexnologiyalar universiteti bilan hamkorlikda plogging aksiyasi tashkil etildi.
Ekoaksiya davomida talabalar va ko‘ngillilar tomonidan “Oqtepa” suv ombori bo‘yida yig‘ilib qolgan har xil maishiy chiqindilar terib chiqildi. Tadbir davomida 50 kilogramdan ortiqroq chiqindi yig‘ildi va Jarqo‘rg‘on tumanidagi chiqindi poligoniga yuborildi.