Azal-azaldan yurtimizda mahalla-ko‘y orasida qo‘ni-qo‘shni, qarindosh-urug‘ orasida mehr-oqibat, sahiylik, saxovatpeshalik, insonparvarlik qon tomirimizga singib kelgan. O‘zlari o‘zga yurtda ro‘zg‘or tebrataman deb qiynalib ishlab pul topishiga qaramay, mahalladoshining-da ahvoliga jim qarab tura olmadi.
Qizirik tumanida “Tinchlik” mahallasidan chet elda ishlab yurgan navqiron yigitlar birgalikda savob ishga qo‘l urishdi. Ular mahalladagi og‘ir vaziyatda yashovchi nogironligi bo‘lgan ikki nafar fuqaroga skuter sovg‘a qilishdi. Bunday savobli ish bilan ular ikki oilaning mushkulini oson, uzog‘ini yaqin qilishdi, ro‘zg‘orlariga baraka olib kirishdi. Skuterlik bo‘lgan oilaboshilarining quvonchi cheksiz, kutilmagan tuhfadan minnatdor.
Yurtimizda ana shunday insonparvar mehr-muruvvatli farzandlarni ulg‘aytirgan ota-onalarga hamda mahallaning hamjihatligiga havas qilsa arziydi. Atrofimizda ana shunday oqibatli, saxovatli farzandlarimizning borligidan faxrlanamiz…
D.Mahmudova
