Energiya tejamkor xonadonlar soni ortmoqda

Elektr energiyasidan foydalanishda limit belgilangani ko‘pchilikni tejamkorlikka o‘rgatdi. To‘g‘ri-da, kimga ham ko‘tarilgan narxda to‘lov qilish yoqardi. Qolaversa, energiya tejamkor manbalari ham keng joriy etilmoqdaki, bu ham aholi uchun katta qulaylik tug‘diradi. Sho‘rchi tumanida ham energiya samaradorligini oshirish orqali hududlarda energiya taqchilligi qoplanishini ta’minlash borasida keng ko‘lamli ishlar amalga oshirilmoqda.
– Shu paytgacha uyimizda elektr energiyasi ta’minotida tez-tez uzilish bo‘lib turardi, – deydi Guliston mahallasida istiqomat qiluvchi Baxtiyor Karimov. – Endi umid qilamizki, xonadonimizda chiroq o‘chmaydi. Uyimizni yoritish, telefonlarimizni quvvatlantirish, televizorni bemalol ishlatish imkoniyatiga egamiz. Quyosh paneli qishki mavsumda ham elektr energiyasini bir maromda yetkazib berishi tufayli nafaqat xonadonimiz ehtiyojini qoplaydi, balki oshiqcha energiyani sotish imkoniga ham ega bo‘larkanmiz.