Maktab formasi – tenglik ifodasi

Yangi o‘quv yili ham boshlanish arafasida. Bozorlarda esa bir-biridan ajoyib dizayndagi maktab formalari terib qo‘yilganki, yoshlar va ota-onalar qaysi birini tanlashga shoshib qoladi. Ammo nima bo‘lganda ham tanlovimiz talab va standartlardan chetga chiqmasligi kerak. Axir, bola maktabga o‘zini ko‘z-ko‘z qilish uchun emas, o‘qish uchun boradi.
Termiz shahridagi 16-umumta’lim maktabida ayni masalaga qaratilgan holda ota-onalar majlisi o‘tkazildi. Unda asosan, yangi o‘quv yiliga munosib tayyorgarlik ko‘rish, o‘quvchilarning maktab formalari, odob-axloq qoidalari yuzasidan so‘z yuritildi. Majlis davomida ota-onalar va keng jamoatchilik vakillari o‘quvchilar uchun yagona maktab formasini joriy etish taklifini bildirib, maktab formasining bir turda bo‘lishi o‘quvchilar orasida o‘zaro tabaqalanish holatlarining oldini olishda muhim ekanligini ta’kidlashdi.
Maktab ma’muriyati tomonidan mazkur taklif inobatga olindi. Bu borada kelib tushgan takliflarga muvofiq ushbu masala maktabning pedagogik kengashida ko‘rib chiqilishi va tegishli qaror qabul qilinishi ko‘zda tutildi. Shuningdek, yangi o‘quv yilida ota-onalar bilan hamkorlikda amalga oshiriladigan istiqbolli rejalar belgilandi.