Kuala Lumpurda xalqaro olimpiada bo‘lib o‘tdi

Matematik hisob-kitoblar qiziqarli va zavqli mashg‘ulot. Jumboqlar, boshqotirmalar sizni to‘g‘ri yechim topishga undaydi. Buning uchun masala va topshiriqni to‘g‘ri usul bilan yechsangiz, kifoya. Shu sababdan ham matematika faniga qiziqishimiz yuqori bo‘ladi va shu dars boshlanishini intiqlik bilan kutamiz. Matematika fanini mustaqil o‘rganuvchilar, qo‘shimcha darslarga qatnaydiganlar ham bo‘ladi. Ularning bilim va mahoratini esa tanlovlar, olimpiadalar yuzaga chiqaradi.
Malayziya davlatida o‘tkazilgan “World Mathematics Invitational” xalqaro olimpiadasi ham ayni maqsadni ko‘zladi. Unda Sariosiyo tumani 1-sonli ayrim fanlar chuqur o‘rganishga ixtisoslashtirilgan maktabining ikki nafar o‘quvchi-yoshlari ham ishtirok etib, finalga qadar borishdi. Qizg‘in bahslarda bilimlar sinaldi va maktabning 3-sinf o‘quvchisi Shahzoda Izzatullayeva 3-, ayni shu maktabning 7-sinf o‘quvchisi Baxtovar Rahmatullayev 4-o‘rinni egallab, Merit medali sovrindori bo‘ldi.