“Yuksalish” umummilliy harakati Latviya mahalliy boshqaruv organlari assotsiatsiyasi bilan hamkorlikda “O‘zbekistonda iqlim o‘zgarishini yumshatish va moslashish bo‘yicha barqaror siyosatni rivojlantirish” loyihasi amalga oshirilmoqda. Ushbu loyiha asosida, Termiz shahrida 3 kunlik seminar treningi o‘tkazildi. Seminarda “Yuksalish” umummilliy harakati rahbari Gulmira Amirova va boshqalar ushbu loyiha haqida atroflicha ma’lumotlar berib o‘tishdi.
Shundan so‘ng, “Iqlim nima uchun va qanday o‘zgaradi” mavzusidagi mini-ma’ruza va iqlim faniga kirish” rolli o‘yini o‘tkazildi. “Barqaror kelajak uchun moslashish va yumshatish” mini ma’ruzasi ham seminar ishtirokchilarini qiziqtirib qo‘ydi. “Iqlim o‘zgarishi bo‘yicha hujjatlarni tahlil qilish” mashqida barcha o‘z imkoniyatlarini ishga soldi. “Hukumronlik kuchi” o‘yini va “Suv kelajagi” simulyatsiya o‘yini esa barchani faollikka chorladi. Ishtirokchilar o‘zlariga va kelajak avlod uchun suv, energetika va tozza havoning qanchalik muhim ahamiyatga ega ekanligi ulardan oqilona foydalanish hamda tabiatni asrab avaylash kerakligi haqida qimmatli ma’lumotlarga ega bo‘lishdi.
Ushbu seminar treningdan ko‘zlangan maqsad, Surxondlaryoda “Iqlim o‘zgarishining ijtimoiy-iqtisodiy oqibatlari to‘g‘risida aholining xabardorligini oshirish, iqlim o‘zgarishiga moslashish va qaror qabul qilish jarayonlarida fuqarolarning ishtirokini oshirish” va ekologik barqarorlikka samarali erishish uchun harakatlarni rag‘batlantirishga qaratilgan.
D.Qo‘zimurotova
