Mehnat yarmarkasi bo‘lib o‘tdi

O‘qishni tamomlagan yosh borki, o‘zi sevgan kasbda ishlashni istaydi. Tajriba oshirsa, yuqori natijalarni qayd etsa… Marrani katta olgan yoshlarning jamiyatda o‘z o‘rinlarini topishlari, izlovlariga munosib kasbni egallashlari uchun Termiz shahridagi San’at saroyida Surxondaryo viloyati hokimligi, viloyat Kambag‘allikni qisqartirish va bandlik bosh boshqarmasi, viloyatdagi barcha boshqarma, korxona, tashkilot va muassasalar tomonidan mehnat yarmarkasi tashkil etildi.
Ushbu mehnat yarmarkasi ishsizlar, ayniqsa, yoshlar va xotin-qizlar, mehnat bozoriga ilk bor kirib kelayotgan bitiruvchilar, probatsiya ro‘yxatida turgan ishsizlarni bandligiga ko‘maklashish, ehtiyojmand aholini mehnat faoliyatiga jalb qilish maqsadida o‘tkazildi. Erta tongdan muhtasham San’at saroyi munosib ish topishni reja qilgan yoshlar bilan gavjum bo‘ldi. Ushbu mehnat yarmarkasida Termiz muhandislik-texnologiya instituti jamoasi ham faol ishtirok etdi.