Sportchilarimiz “Osiyo bolalari”da g‘olib

Yozgi ta’til maroqli o‘tmoqda. Yoshlar munosib xordiq chiqarish bilan birga sportda, san’atda, ijodda muvaffaqiyatga erishayotganlari oltinga teng vaqtlarini behuda o‘tkazishmayotganidan dalolat. So‘zimiz isboti sifatida aytishimiz mumkinki, ayni kunlarda Rossiya Federatsiyasining Saxa Respublikasi, Yakutsk shahrida anʼanaviy “Osiyo bolalari” kompleks musobaqasi boʻlib oʻtmoqda.
Ushbu nufuzli musobaqada Osiyoning iqtidorli o‘g‘il-qizlari qatorida yurtimiz sharafini munosib himoya qilish maqsadida surxondaryolik yosh sportchilar ham jonbozlik ko‘rsatishdi. Ular erishgan g‘alaba va muvaffaqiyat maqtanishga, iftixor etishga arziydi. Dzyudo bo‘yicha Musurmon Ahrorov bo‘sh kelmadi, barcha raqiblari bilan mardonavor kurashib -90 kilogramm vazn toifasida 1-o‘rin bilan oltin medalga sazovor bo‘lgan bo‘lsa, ayollar kurashi bo‘yicha Shahzoda Azimova ham nechog‘lik chapdast ekanini ko‘rsata oldi va o‘z vazn toifasida ikkinchi bo‘ldi.