Yildan yilga O‘zbekiston Jurnalistlar uyushmasi a’zolari soni yangilanib bormoqda. Surxondaryo viloyatida ham a’zo bo‘lish niyatida doimiy nomzodlar murojaat qilib keladi. Ular orasida ommaviy axborot vositalarida 1983-yildan buyon ijodiy faoliyat olib borayotgan, shu bilan birga, tibbiyot sohasining fidoyi jonkuyari bo‘lgan Jumanazar Madiyev ham bor.
Uzoq yillik faoliyati va tahliliy maqolalari bilan gazetxonlar e’tiboriga tushgan ijodkorning mehnati yuqori baholanib, O‘zbekiston jurnalistlar uyushmasi a’zoligiga qabul qilindi.
Uyushmaning viloyat bo‘limi tashabbusi bilan Jumanazar Madiyevning ijodiy faoliyatiga bag‘ishlangan tadbir tashkil qilindi. Termiz shahridagi Matbuot uyida bo‘lib o‘tgan tadbirda o‘tgan yillar davomida Jumanazar Madiyevning faoliyati, izlanishlari haqida so‘z bordi.
Yakunda O‘zbekiston Jurnalistlar uyushmasi Surxondaryo viloyat bo‘limi raisi Muxiddin Abdurahmonov a’zolik guvohnomasi va ko‘krak nishonini topshirdi.
Tohir Aliqulov
