Milliylikni tarannum etib…

Yoshlarga milliylikni o‘rgatish, qadriyatlarimizga hurmat ruhida tarbiyalash uchun eng avvalo, harakatni ularning bola yoshidan boshlash lozim. Bola nima o‘ynayapti, nima tomosha qilyapti — ayni jihatlarga e’tibor qarataylik.
Birinchi o‘yinchog‘i Barbi qo‘g‘irchoqlari, sovuq qurollar emas, milliy ertak qahramonlarimiz bo‘lishi kerak. Qolaversa, bu qo‘g‘irchoqlarning usti-boshi yengil-yelpi, ochiq-sochiq emas, atlas-u adrasdagi milliy liboslarda bo‘lsa, nur ustiga nur. Ana shundagina qizlarimiz zamonaviylikni ommaviy madaniyat darajasiga ko‘tarmasdan milliylikni o‘zlariga zeb bilishadi.
Bolajonlarni milliy ruhda tarbiyalashga katta e’tibor qaratilayotgan bir paytda Sho‘rchi tumanidagi 2-sonli davlat maktabgacha ta’lim tashkilotida milliy qo‘g‘irchoqlar ko‘rgazmasi tashkil etildi. Ko‘rgazmadan maktabgacha ta’lim tashkiloti tarbiyachilari tomonidan oddiy qog‘oz, yog‘och, mato va bo‘yoqlardan foydalanib yasagan bejirim qo‘g‘irchoqlar o‘rin olgan. Ular nafaqat bola uchun ovunchoq, balki tarbiya vositasidir. U orqali bola milliy an’analarni, millatga xos qadriyatlarni his etadi, kerak bo‘lsa, o‘rganadi ham.