“Oqshom hotel” foydalanishga topshirildi

Surxondaryo viloyatida ham turizm sohasi rivoj topib, xizmat ko‘rsatish tizimida ham e’tiborga molik ishlar amalga oshirilmoqda. Tashrif buyuradigan mehmonlarga munosib xizmat ko‘rsatish, ularning qo‘nim topishi, hududlar bo‘ylab kezishi ham Surxondaryoning diqqatga sazovor joylari haqida yanada yaxshiroq ma’lumotlarga ega bo‘lishlari uchun bor imkoniyatlardan foydalanilmoqda.
Ayni shu maqsadda Sariosiyo tumanida barcha sharoitlarga ega bo‘lgan zamonaviy yangi mehmonxona – “Oqshom hotel” foydalanishga topshirildi. Mehmonxonaning ochilishi munosabati bilan tashkil etilgan tadbirda tuman hokimi Abduqodir Donayev, sektor rahbarlari, nuroniylar va jamoatchilik vakillari ishtirok etdi.
Aytish kerakki, tadbirkor Azam Ishonqulovning o‘z mablag‘i evaziga qurilgan mehmonxona 38 o‘ringa mo‘ljallangan bo‘lib, har bir xonaning o‘zida yuvinish xonalari mavjud. Shuningdek, tarkibida shinam konferensiya zali, oshxona ham mehmonlar xizmatiga shay.
Mehmonxona ish boshlashi bilan 6 nafar ishsizning bandligi ta’minlandi.