Hamshiralar skuterlik bo‘ldi

Xonadonimizda yosh bola, yoshi keksa nuroniylarimiz bor. Shunday ekan, issiq jonning issig‘i chiqib, tibbiy xizmatga tez-tez ehtiyoj sezamiz. O‘z navbatida o‘zimiz yashaydigan hududdagi oilaviy poliklinikalar, qishloq vrachlik punktlarining patronaj hamshiralari jonimizga ora kiradi. Ularning raqamlarini teramiz-da, yordam so‘raymiz.
Shunday paytda masofa masalasi muammo bo‘ladi. Tez yordam chaqirsangiz-ku, zumda kelar, ammo hamshiraning mahallalarda uyma-uy yurishi biroz vaqt olishi ham bor gap. Ana shunday sharoitda tibbiy xizmat sifatini yaxshilash hamda vaqt masalasiga munosib yechim toppish maqsadida patronaj hamshiralari zarur texnika va jihozlar bilan ta’minlanayotir. Uzun tumanidagi 72-sonli oilaviy poliklinikada aholiga patronaj xizmati ko‘rsatish ishlarini yanada yaxshilash maqsadida elektroskuter va planshetlar hamda poliklinika uchun tibbiy asbob-uskuna va jihozlar topshirildi.