Maqom — xalqimizning musiqiy ensiklopediyasidir. Unda tariximiz, ma’naviy dunyomiz, milliy ruh mujassam. Asrlar silsilasidan o‘tib, madaniy meros sifatida bugungacha sayqal topib kelayotganining sababi ham shundan. Shunday ekan, maqom san’atini yoshlar ongiga singdirish, tinglash madaniyatini shakllantirish lozim. Boysun tumanidagi Madaniyat markazida O‘zbekiston Respublikasi Madaniyat Vazirligi O‘zbek milliy maqom san’ati markazi huzuridagi Marg‘ilon shahri musiqali maqom teatrining “Maqom tarovati” nomli Alisher Navoiy spektaklidan sahnalashtirilgan Maqom konsert dasturi ayni maqsadga xizmat qildi.
Bu yo‘lda O‘zbekiston Respublikasi Prezidentining 2023-yil 5-sentyabrdagi “O‘zbek milliy maqom san’atini yanada rivojlantirish va soha vakillari faoliyatini qo‘llab-quvvatlash choralari to‘g‘risida”gi PQ-289-son qarori dasturilamal bo‘lib xizmat qildi. Maqom kechasida Marg‘ilon shahri musiqali maqom teatrining maqom ansambli ijrosidagi eng sara maqom va mumtoz qo‘shiqlar jonli ijro etildi. Tomoshabinlar qalbiga manzur bo‘lgan ijrolarni jon quloqlari bilan tingladilar, madaniy xordiq chiqardilar.
