Xotin-qizlarga hunar o‘rgatilmoqda

Insonning kasbu kori, hunari bo‘lsa, uyda o‘tirib ham o‘zini band qilishi, ro‘zg‘origa naf keltirishi mumkin. Ishsiz, qo‘lida hunari bo‘lmagan, ammo ishlashni istovchi xotin-qizlarni qo‘llab-quvvatlash maqsadida monomarkaz va o‘quv kurslari tashkil etilganki, bu bilan ular jamiyatda o‘z o‘rinlarini topish imkoniga ega bo‘lishayotir. Angor tumanida “Ishga marhamat” monomarkazining mahallalarda filiallari tashkil etilib, xotin-qizlar kasb-hunarga o‘rgatilayotgani fikrimiz tasdig‘idir.
Jumladan, tumanning birinchi sektor hududiga qarashli Ulugʻbek mahallasida monomarkaz filiali faoliyat yuritayotir. Unda Ulugʻbek, Xoʻjanqon va Yangiobod mahallalarida istiqomat qilib kelayotgan xotin-qizlar kasb-hunar egallashmoqda. Markazda har kuni o‘quv jarayonlari qizg‘in tus olgan bo‘lib, xotin-qizlar tikuvchilik sir-asrorlarini o‘rganishayotir.
Aytish kerakki, filial tashkil etilgandan hozirgi kunga qadar 150 nafardan ortiq xotin-qiz tikuvchilik hunarini o‘rgandi.