QAHRAMONNING IBRATLI HAYOTI

Xotira aziz, ayniqsa, vatan uchun, uning himoyasida jon fido etgan qahramonlarni xalq hech qachon unutmaydi. Ular qalbimizda, xotiramizda bir umr yashaydi. Mamlakatimiz tinchligini buzishga uringan terrorchilar bilan bo‘lgan qurolli to‘qnashuvda Muzrabot tumanidagi “Soppollitepa” mahallasida yashagan Ulug‘bek Alibekov ham bor edi. O‘z yigitlik burchini o‘tab, hayotini harbiylikka, vatan xizmatiga bog‘lagan o‘g‘lon ushbu to‘qnashuvda dushmanga qarshi mardonavor kurashdi va qahramonlarcha halok bo‘ldi.
“Vatan himoyachilari kuni” oldidan qahramon o‘qigan tumandagi 15-maktabda “Qahramonning ibratli hayoti” mavzusida vatanparvarlik ruhidagi ma’naviyat soati bo‘lib o‘tdi va Ulug‘bek Alibekov xotirasi yod olindi. Ulug‘bekning ustozlari, tanigan-bilganlar, do‘stu yorlari so‘zga chiqib, qahramon bilan bog‘liq voqealarni eslashdi, uning tantiligini, samimiyatini tilga olishdi.
Mana shunday haqiqiy er o‘g‘lonlar bor ekan, yurtimiz, uning sarhadlari ishonchli qo‘llarda. Qahramonimiz Ulug‘bek Alibekovning yorqin xotirasi esa qalblarimizda abadiy saqlanib qoladi.