Munosib ishtirok etdi

Jarqo‘rg‘onlik yoshlar sportda ko‘plab yutuq va muvaffaqiyatlarga erishib kelmoqda. Bunga bosh sabab esa tumandagi sport maktabida yoshlarga munosib mashg‘ulotlar olib borilayotganida, mahoratli trenerlarning mashaqqatli xizmatida. Xuddi shunday trener, “Shuhrat” medali sohibasi Manzura Tursunova ham munosib shogirdlar yetishtirib chiqarib, yurtimiz bayrog‘ini yuksaklarga ko‘tarishga qo‘shgan hissasini e’tirof etmaslikning iloji yo‘q. Manzura Tursunovaning yana bir shogirdi Lobar Hurramova ham kuni kecha Yaponiya poytaxti Tokio shahrida para dzyudo bo‘yicha Tokio Gran-Pri musobaqasiga ishtirok etdi.
Musobaqa start olishi bilan para dzyudochilar o‘z mahoratini ishga solib, murosasiz kurashlarni boshlab yubordilar. Lobar ham aslo bo‘sh kelmadi. Raqiblarini birin-ketin yengib, musobaqaning dastlabki kunida o‘z vazn toifasida 3-o‘rinni egalladi.