Xalqimiz mehr-oqibat, insoniylik tuyg‘ularini o‘z o‘rnida qo‘yib, yaqinlarini, do‘stu birodarlarini qadrlaydi. Ana shu jihatlar yurtimizda qadriyat tusini olgan emasmi, xalqimizning ijtimoiy himoyaga muhtoj, nogironligi bor qatlami domiy e’tiborda, qo‘llab-quvvatlovda. 3-dekabr – Xalqaro nogironlar kuni respublikamizda keng nishonlanib, turli tadbirlar, kechalar tashkil etilgan bo‘lsa, Surxondaryo viloyatida ham ko‘tarinki ruhda o‘tkazildi. Termiz shahridagi “Afruz” tantanalar saroyida tadbir bo‘lib o‘tdi.
Unda ishtirok etgan viloyat hokimining o‘rinbosarlari, davlat va jamoat tashkilotlari rahbarlari nogironligi bo‘lgan shaxslar doimo davlat va jamiyat g‘amxo‘rligida ekanligini ta’kidlashdi. Samimiy tilaklardan so‘ng, kecha sababchilariga viloyat hokimligining esdalik sovg‘alari, protez-ortopediya mahsulotlari, nogironlik aravachalari, eshitish moslamalari, hassa va qo‘ltiq tayoqlar topshirildi.
To‘kin dasturxon atrofida tashkil etilgan bayram tadbirida san’atkorlar tomonidan ijro etilgan kuy-qo‘shiqlar barchaning qalbiga ko‘tarinki kayfiyat ulashdi.
