Avtomatlashtirilgan dispetcherlik xizmati tashkil etiladi

Rivojlangan davlatlarni qo‘ya turaylik, respublikamizning poytaxtida ham avtobuslarda yurish uchun oylik chipta va jetonlardan foydalaniladi. Bu ortiqcha kirim-chiqim, qaytim qaytarishga ketadigan vaqtni tejaydi. Ko‘pchilik yo‘lovchilar, qulaylik istab, yo‘l kirani to‘lashda, umuman yo‘lovchilar, transport vositalarining nazoratini yo‘lga qo‘yishda qandaydir tizim yo‘lga qo‘yilishini istashlari ijtimoiy tarmoqlardagi fikrlar ketma-ketligidan ham ma’lum. Keng jamoatchilikning taklif hamda munosabatlari inobatga olingan holda Oʻzbekiston Respublikasi Prezidentining 2023-yil 16-fevraldagi “Jamoat transporti tizimini isloh qilish chora-tadbirlari toʻgʻrisida”gi qaroriga asosan Surxondaryo viloyatida 2024-yildan shaharlarda avtobus yoʻnalishlarining yangi tarmogʻi joriy etiladi hamda avtomatlashtirilgan toʻlov tizimi va avtomatlashtirilgan dispetcherlik xizmati bosqichma-bosqich yoʻlga qoʻyiladi.
Jumladan, Transport boshqarmasi huzurida “Surxondaryo yoʻlovchi tashishni monitoring va nazorat qilish” davlat muassasasi tashkil etilgan boʻlib, ushbu muassasada 2024-yilda avtomatlashtirilgan dispetcherlik xizmati ish boshlaydi. Hozirda avtomatlashtirilgan dispetcherlik markazi uchun 31 ta shtat birliklarini ajratish, yangi oʻrinlarini yaratish ishlari amalga oshirilmoqda.