Qiziqish muvaffaqiyatga boshladi

Farzandi taqdirini, ertangi kunini o‘ylagan borki, uning ta’lim-tarbiyasiga, til o‘rganishiga katta e’tibor qaratayotir. Uzoqni ko‘zlab tashlangan qadam esa marraga yetmay qolmaydi. Shu sababdan ham maktab o‘quvchilari orasida ilm-fanda, sportda va ko‘plab sohalarda muvaffaqiyatga erishayotganliklarining guvohi bo‘lib kelmoqdamiz. Ayniqsa, til o‘rganish, til bilish sertifikatini qo‘lga kiritish yoshlar uchun katta imkoniyatlar eshigini ochmoqda.
Muzrabot tumanidagi 14-umumiy o‘rta ta’lim maktabining 8-sinf o‘quvchisi Shexruz Saydullayev ham ingliz tilini o‘rganishga qiziqib, bu ishning uddasidan chiqdi ham. Hozirda o‘z ona tilisidek ingliz tilida so‘zlasha oladigan Shexruzga tengdoshlari havas bilan boqadi.
U yaqinda Malayziya davlatining Kuala-Lumpur shahrida bo‘lib o‘tgan ingliz tili fanidan Eurasian Spelling Bee Xalqaro olimpiadasining final bosqichida ishtirok etib, e’tirof etildi. Mehnat va harakatning mukofoti shu bo‘lsa kerak-da.