Arxeologik topilmalardan Qo‘qon paranjisigacha

Sho‘rchi tumanidagi 1-umumta’lim maktabida tarix muzeyi tashkil etilgan. Ushbu muzeydan nafaqat o‘quvchi-yoshlarning, balki tuman ahlining-da oyog‘i uzilmaydi. Muzeyda Dalvarzintepadan topilgan qadimiy buyumlardan arxeologik topilmalargacha uchratish mumkin. Ayniqsa, Qo‘qon paranjisi kelib-ketguvchilarning e’tiborini tortadi. Eksponatlarni sanasangiz, son-sanog‘i ikki mingga yaqin ekaniga o‘zingiz ishonch hosil qilasiz.
Ha aytgancha, bu maskanda joy olgan qadimiy liboslar orqali momolarimiz qanday liboslar kiyib, qanday taqinchoqlar taqqanini bilib olish mumkin. O‘ziga xos dizayn va tikilish uslubiga ega ushbu liboslardan qizlar andoza olishayotgani ham sir emas.
“Keksalar uchun turizm oyligi” doirasida ichki turizmni rivojlantirish maqsadida bir guruh nuroniylar 1-umumta’lim maktabi qoshida tashkil etilgan tarix muzeyiga sayohat uyushtirdilar va olam-olam taassurotlar oldilar.