Guljanoy yana g‘olib

Guljanoy Naimova nomi bugun faqat O‘zbekistonda emas, butun jahonga ma’lum. U yenggan sportchilar esa Guljanoyni kuchli va jasur raqib sifatida eslab qolgan. Sababi u raqibiga peshvoz chiqdimi abjirlik va mahorat bilan yengishga harakat qiladi va buning uddasidan chiqadi ham. Eng avvalo, u raqibini obdon kuzatadi, so‘ng hujumga o‘tadi. Qarabsizki, g‘alaba naqd.
Ayni kunlarda Xitoyning Hangjou shahrida bo‘lib o‘tayotgan Para Osiyo o‘yinlarida ham Para-taekvondo bo‘yicha O‘zbekiston terma jamoasi a’zosi Guljanoy Naimova ishtirok etib, u bilan qarshi chiqayotgan raqibalarining qalbiga g‘ulg‘ula solgani aniq. U muvaffaqiyatli harakatlari bilan o‘z sovrinlari qatoriga Para Osiyo o‘yinlarining oltin medalini ham qo‘shib qo‘ydi. Ayollar o‘rtasida +65 kilogramm vazn toifasida ishtirok etgan vohadoshimiz barcha raqiblarini mag‘lub etgan holda musobaqa chempioniga aylandi.