Yoshlar uchun yengillik…

Ukam oliygohga o‘qishga kira olmaganiga quvonishni ham, xafa bo‘lishni ham bilmadik. Sababi, yetarli ball to‘play olmaganidan xafa bo‘lsak, xalq tilida aytganidek “super kontrakt”da o‘qish imkoni borligi umidlantirdi-da. Shu tariqa 92 million so‘mning bahridan kechib, o‘qitishga qaror qildik.
Ammo, 2023/2024-o‘quv yili uchun o‘tkazilgan bakalavriatga kirish imtihonlari natijalariga ko‘ra oliy ta’lim vazirligining qator yangiliklari shoshqaloqlik qilib qolganimizni ko‘rsatib qo‘ydi.
Sababi bu yil ham talabalikka tavsiya etilmagan abituriyentlarga ro‘yxatdan o‘tishda tanlangan barcha bakalavriat ta’lim yo‘nalishlaridan birida tabaqalashtirilgan to‘lov-kontrakt asosida o‘qish imkoniyati berilgan. Ro‘yxatdan o‘tishda tanlangan 2-, 3-, 4- yoki 5-bakalavriat ta’lim yo‘nalishlaridan biriga talabalikka tavsiya etilgan, biroq to‘plagan bali tanlangan birinchi bakalavriat ta’lim yo‘nalishida to‘lov-kontrakt asosidagi o‘tish balidan past bo‘lgan abituriyentlarga tanlangan birinchi bakalavriat ta’lim yo‘nalishiga tabaqalashtirilgan to‘lov-kontrakt asosida o‘qish imkoniyati berildi. Bunda, abituriyentlarning kirish imtihonlari natijalariga ko‘ra to‘plagan ballari asos sifatida qabul qilinadi.
Belgilangan tartibga ko‘ra kirish imtihonlari natijalariga ko‘ra, belgilangan minimal o‘tish balidan (56,7 balldan) kam ball to‘plagan abituriyentlarga ham birinchi o‘quv yiliga muayyan ta’lim yo‘nalishi uchun belgilangan tabaqalashtirilgan to‘lov-kontrakt miqdorining 2 barobariga teng to‘lovni amalga oshirish sharti bilan o‘qishga kirish huquqi berilgani yoshlarga va ularning ota-onalariga katta yengillik beradi-da. Xolbuki, to‘lov-kontraktning 2 barobarini to‘lash qayoqda-yu, 92 million so‘m… ha, nima bo‘lganda ham ukam berilgan imkondan foydalanib, kelajakda vatan koriga yaraydigan mutaxassis bo‘lib yetishsa bo‘lgani.