“Mehr daftari”dagi yoshlarga uy berildi

Ota-ona farzandini oq yuvib, oq tarab ulg‘aytiradi. Ta’lim-tarbiyasi, kelajagi uchun qayg‘uradi. Albatta, farzand ham bu g‘amxo‘rlikni his etib ulg‘aygani uchun ham qalbida insoniylik, mehr-oqibat tuyg‘ulari bilan kamol topadi. Xo‘sh, ota-ona g‘amxo‘rligidan mahrum bolalarchi? Ularning taqdiri qanday bo‘ladi? Yurtimizda ota-ona qaramag‘idan mahrum bolalar haqida ham bunday savol tug‘ilmaydi. Sababi, bunday bolalarning ta’lim-tarbiyasi, kelajagi haqida davlat otalarcha qayg‘uradi va kerakli yordam hamda imkonni berib kelmoqda.
Surxondaryo viloyatida yetim va ota-ona qaramog‘idan mahrum bo‘lgan, sobiq Mehribonlik uyi tarbiyalanuvchilarining bir guruhiga “Mehr daftari” jamg‘armasi mablag‘lari hisobidan Termiz shahridagi “Guliston” mahalla fuqarolar yig‘inida qurilgan yangi uy-joylarning kalitlari topshirilishi ham ana shunday e’tiborning yuksak namunasidir.
Ushbu xonadonlarning har biri 73 kvadrat metr maydonga ega bo‘lib, xonalari keng va shinam. Qolaversa, barcha maishiy va zarur uy-ro‘zg‘or jihozlari bilan to‘liq ta’minlangan. 23 yoshdan 30 yoshgacha bo‘lgan 6 nafar sobiq Mehribonlik uyi tarbiyalanuvchisiga berilgan uylar xonadon egalariga haqiqiy ma’nodagi vatan bo‘lib, o‘z oilalari bilan bahamjihat yashaydilar.