Beruniy hayoti va ijodiga bag‘ishlandi

Tariximiz, ajdodlarimiz bilan faxrlanadigan xalqmiz. Haqiqatan ham buyuk ajdodlarimiz, bobolarimizning muqaddas dinimiz-u dunyoviy bilimlarning yanada sayqallanishida, biz avlodlarga yetkazishda hissasi benihoya katta. Biz esa munosib voris sifatida ularni o‘qib o‘rganmog‘imiz lozim. Qolaversa, Amir Temur, Alisher Navoiy, Z.M.Bobur kabi buyuk bobokalonlarimiz haqida kino va filmlar yaratib, ularning hayoti, shaxsiyati, amalga oshirgan ishlari haqida yanada yaxshiroq bilib olishimiz mumkin bo‘layotir.
Sharq olimu fuzalolari bo‘lmish buyuk allomalarimizni nafaqat o‘zbek xalqi, balki dunyo ahli bilishi lozim. Ayni jihatlarni hisobga olgan holda YuNESKO Bosh qarorgohida Abu Rayhon Beruniy hayoti va ijodiga bag‘ishlangan ko‘rgazmaning ochilishi bo‘lib o‘tdi. Ochilish munosabati bilan atoqli bastakor Dmitriy Yanov-Yanovskiy asarining jahon premyerasi ham o‘tkazildi. E’tiborli jihati, bastakor “Zij – Burjlar taronasi” asarini Sharqning to‘rt buyuk mutafakkiri: Al-Xorazmiy, Ibn Sino, Abu Rayhon Beruniy va Mirzo Ulug‘bek siymosiga hurmat tariqasida yaratgan.
Alibek Kabdurahmonov boshchiligidagi O‘zbekiston milliy simfonik orkestri ijrosi san’at ixlosmandlarini O‘zbekiston madaniy-tarixiy merosining yangi qirralari bilan tanishtirdi.